Башкы прокуратура: Тарых музейи боюнча бардык маалымат текшерилет

Автор -
0

Башкы прокурордун орун басары Нурлан Дүйшембиев «Ата Мекен» фракциясынын көчмө жыйынында айтылган бардык маалымат текшерилерин айтты. Бул тууралуу жыйынга катышып жаткан «Азаттыктын» кабарчысы маалымдады.

«Ата Мекен» фракциясынын депутаттары бүгүн Улуттук тарых музейинде аны оңдоп-түзөөгө байланыштуу маселелерди талкуулаш үчүн көчмө жыйын курууда. Жыйын учурунда парламент өкүлдөрү реконструкциялоо иштеринде одоно мыйзам бузуулар болгонун айтып, ага ашыкча каражат сарпталганына жана Түркия тараптын оңдоп-түзөөгө көмөктөшүү сунушунан баш тартканына нааразы болуп чыгышкан.

Жыйында Тарых музейинин кызматкери 58 даана жыгачтан жасалган «Барсбек» деп аталган инсталляциянын ар бири 600 доллардан экенин билдирип, инсталляция интеллектуалдык эмгек болгондуктан, анын баасы кымбат экенин айтты.

Ошондой эле анда эмеректердин баасы тууралуу да маселе көтөрүлүп, депутаттар аларды мынча кымбат баага Германиядан алып келүү канчалык зарыл болгонуна кызыгышты.

«Азыр Кыргызстанда өндүрүлгөн эмерек Казакстанга жана башка чет өлкөлөргө экспорттолуп жатат. Тарых музейинин эмеректерин өзүбүздөн алсак болбойт беле? Бул инсталляция жөнөкөй эле жыгач. Ар бирөө 600 доллар же бир жылкынын баасы», — деди депутат Каныбек Иманалиев.

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз!

comments powered by HyperComments
Бөлүшүү