Цыган улутундагы Орусиянын 63 жаштагы жараны жасалма паспорт менен Кыргызстандын чек арасынан буга чейин бир нече жолу өткөн.
Аталган жаран Чүй облусунун Чүй районундагы паспорт-визалык каттоо бөлүмүнөн 1960-жылкы В.Анын атына жасалма документ алган. Чек арадан өтүп жүргөндөн сырткары, алып-сатуу иштери менен алектенип, өзүнө унаа каттатууга да жетишкен.
Ал орусиялык боксёр Иван Климовду өлтүргөн деп эл аралык издөөдө жүргөн Ян Лебедевдин атасы болот деген маалыматтар да бар. Ян 2013-жылы Бишкек шаарынан кармалып, анын жанынан КРдин МККсы тарабынан берилген жасалма паспорт менен айдоочу күбөлүгү табылган.
Иликтөөлөрдүн натыйжасында Орусияда анын маңзаттарды мыйзамсыз өстүрүү жана сатуу боюнча соттолгону маалым болгон.
Азыркы чет өлкөлүк жарандарга жасалма паспорт берүү боюнча тергөө амалдары жүрүп жатканын ИИМдин басма сөз кызматы билдирди.
