Португалиянын мурдагы премьер-министри Антониу Гутерреш Бириккен Улуттар Уюмунун тогузунчу баш катчысы катары колун БУУнун Уставына коюп Башкы Ассамблеянын 193 мүчөсүнүн алдында ант берди.
Ал кызматтык мөөнөтү аяктап бараткан баш катчы Пан Ги Мундун ордун басып, 2017-жыл башынан тарта толугу менен ишке киришет. Гутерреш 1995-жылдан 2002-жылга чейин Португалиянын премьер-министри, 2005-жылдан 2015-жылга чейин БУУнун качкындар иштери боюнча Жогорку комиссары кызматтарында иштеген.
67 жаштагы Гутерреш уюмдун 71 жылдык тарыхындагы тогузунчу башчысы болот. Португалия премьерлиги жана качкындар көйгөйлөрү менен алектенген агенттиктин башчысы тажрыйбасына ээ анын талапкерлиги октябрь айында Башкы ассамблеянын көпчүлүк колдоосуна ээ болгон.
