Бүгүн Кыргыз Республикасынын Тышкы иштер министри Эрлан Абдылдаев БУУ системасынын туруктуу координатору, ПРООНдун туруктуу өкүлү Александр Аванесовду, анын Кыргызстандагы миссиясы аяктагандыгына байланыштуу кабыл алды.
Жолугушуунун жүрүшүндө Абдылдаев Аванесовго Кыргызстандагы активдүү жана жемиштүү иштегендиги үчүн ыраазычылык билдирип, мамлекеттин экономикасына жана социалдык тармактарына багытталган БУУнун колдоосундагы бир катар долбоорлорду белгилей кетти.
Кыргызстан менен БУУнун кызматташтыгын чыңдоодогу анын ишмердүүлүгүнө ыраазычылык катары Абдылдаев тарабынан ага КР ТИМдин Ардак грамотасы тапшырылды.
Жолугушуунун аягында тараптар БУУнун Кыргыз Республикасындагы атайын агенттиктери менен кызматташуунун алдыдагы иштерин талкуулашты.
