Кыргызстан президенти Алмазбек Атамбаев орусиялык кесиптеши Владимир Путин менен бейформал жолугушуу өткөрдү.
Өкмөттүн маалыматтык саясат бөлүмүнөн кабарлашкандай, жолугушуунун жүрүшүндө Кыргызстан менен Орусиянын ортосундагы эки тараптуу кызматташтыктын актуалдуу маселелери, ошондой эле алдыдагы эки тараптуу сүйлөшүүлөрдүн күн тартиби талкууланды.
Алмазбек Атамбаев мамлекеттик сапарынын алкагында бүгүн Москвада Кыргызстандын Орусиядагы Маданият күндөрүнүн ачылышына катышат. Эртең Алтай цивилизациясын иликтөө менен алектенген тарыхчылар жана эксперттерден турган Орусиянын илимий чөйрөсүнүн өкүлдөрү менен жолугушат. Андан сырткары Кыргызстан президентинин Орусияда жашаган кыргызстандыктар менен жолугуп, Москва шаарындагы мечитке баруусу пландалган.
Ошондой эле Алмазбек Атамбаевдин Орусиянын өкмөт башчысы Дмитрий Медведев менен да жолуга тургандыгы кабарланган.
Президенттин мамлекеттик сапары Кыргызстан менен Орусиянын ортосундагы дипломатиялык алакалардын түзүлгөндүгүнүн 25 жылдыгына арналган.
