Сапар Исаков бүгүн, 28-мартта, 2018-жылдын жазгы талаачылык иштеринин жүрүшү боюнча облус жана район жетекчилеринин катышууусунда селектордук кеңешме өткөрдү.
Премьер-министр өз сөзүндө дагы бир жолу айыл чарба — атамекендик экономиканын маанилүү тармактарынын бири болуп эсептелеерин белгиледи, буга байланыштуу жазгы талаа иштерин өз убагында жана сапаттуу жүргүзүүнүн маанилүүлүгүн баса белгилеп кетти.
Вице-премьер-министр Дайыр Кенекеев 2017-жылдын жыйынтыгы боюнча айыл чарба продукциясынын дүң жыйыны 207,4 млрд сомду түзүп, өсүү темпи 2016-жылга салыштырмалуу 102,2% түзгөнүн маалымдады.
Ал белгилегендей үстүбүздөгү жылы аба ырайынын шартына байланыштуу жазгы талаа иштери 2017-жылга салыштырмалуу эки жумага эрте башталды.
«2018-жылы республика боюнча айдоо 584,1 миң гектар жерге пландалган. Бүгүнкү күндө 123,3 миң гектар жерде жумуштар аткарылды, бул жалпы пландын 21,1% түзөт», — деди Дайыр Кенекеев.
Аны менен катар вице-премьер-министр өлкөдөгү айыл чарба техникаларынын дээрлик 80% эскилиги жеткенин белгиледи, буга байланыштуу дыйкандарга жана фермерлерге лизингдик насыяларды берүүнү активдештирүү жана кеңейтүү зарылдыгын баса белгиледи.
«Техниканы лизингге берүү үчүн тийиштүү каражаттар бар, бирок көп учурда тиешелүү министрликтер жана жергиликтүү бийликтер аталган маселени чечип берүүнү кечиктиришет», – деди Дайыр Кенекеев.
Кыргыз Республикасынын айыл чарба, тамак-аш өнөр жай жана мелиорация министри Нурбек Мурашев Өкмөт башчынын тапшырмасына ылайык, жер-жерлерде айыл чарба аянттарынын курамы жана адистештирүүгө үйрөткөн семинарлар жана түшүндүрүү иштер жүрүп жатканын маалымдады.
«Семинарлар жаңы айыл чарба методикаларын кийирүү, фермерлерди заманбап айыл чарба технологияларына үйрөтүү, айдоо аянттарын оптимизациялоо жана айыл чарба өсүмдүктөрүн айдала турчу жерлерге ылайыкташтыруу максатында өтүп жатат», — деди Нурбек Мурашев.
Андан тышкары анын айтымында айылдагы товар өндүрүүчүлөргө мамлекеттик колдоо көрсөтүү максатында аларды айдоо усулдары, күйүүчү майлоочу материалдары жана минералдык жер семирткичтери менен тийиштүү көлөмдө камсыз кылуу каралган. Аны менен катар айыл чарба техника жана гидротехникалык курулуштардын ремонту камсыз кылынат. Айыл чарба, тамак-аш өнөр жай жана мелиорация министри жазгы талаачылык иштерин тийиштүү түрдө жүргузүү максатында пайда болгон көйгөйлөрдү ыкчам чечүү үчүн республикалык штаб түзүлгөнүн кошумчалады. Өлкөнүн ар бир аймагында облустук штабтар түзүлгөн.
«Бүгүнкү күндө «Айыл чарбаны каржылоо-6» программасынын алкагында 1 152 фермерге 405,6 млн сом суммасында жеңилдетилген насыя берилди. Республика боюнча иштер пландык режимде жүрүп жатат, региондордо күйүүчү майлоочу материалдарга болгон жетишсиздик байкалган жок», — деди Нурбек Мурашев.
Кеңешменин жүрүшүндө Өкмөттүн региондордогу ыйгарым укуктуу өкүлдөрү жер-жерлердеги жазгы талаачылык жумуштарын ишке ашыруунун жүрүшү жөнүндө маалымат беришти.
Премьер-министр Сапар Исаков тиешелүү министрликтерге жана жергиликтүү бийликтегилерге зарыл болгон бардык иштерди мурда белгиленген мөөнөттө талап кылынгандай жүргүзүүнү камсыз кылууну тапшырды.
Өкмөттүн аймактардагы өкүлдөрүнө бул маселени күндөлүк көзөмөлгө алууну тапшырды. Андан сырткары, жазгы талаачылык иштери жүзгүзүлгөн мезгилде күйүүчү-майлоочу материалдардын баасын өзгөчө көзөмөлгө алуу жана аны менен фермерлерди жетишерлик өлчөмдө камсыз кылууну тапшырылды.
Ошондой эле Өкмөт башчы «РСК Банк» ААК жана «Айыл банк» ААКтын жетекчилигине жер-жерлерде жеңилдетилген насыялардыберүү процессинин ачыктыгын жана тазалыгын камсыз кылууну буйруду.
Өзгөчө кырдаалдар министрлигине жергиликтүү бийликке региондогу аба ырайынын шарттары тууралуу өз учурунда маалыматты камсыз кылууну тапшырды.
