Ибрагим Жунусов Өзбекстандын Мамлекеттик инспекциясынын башчысы менен жолугушту. Бул тууралуу Тышкы иштер министрлигинин маалымат кызматы билдирди.
Маалыматка ылайык, 18-февралда Ташкент шаарында Кыргыз Республикасынын Өзбекстан Республикасындагы Атайын жана Ыйгарым укуктуу Элчиси Ибрагим Джунусов Өзбекстан Республикасынын учуулардын коопсуздугун көзөмөлдөө Мамлекеттик инспекциясынын башчысы Толиб Ульжаев менен жолугушту.
Тараптар жарандык аба жаатында эки тараптуу кызматташуунун учурдагы абалы жана Кыргызстан менен Өзбекстандын авиация кызматтарынын ортосундагы мындан аркы өз ара алакалашуусунун перспективалары жөнүндөгү маселелерди талкуулашты.
Учурдагы Кыргыз Республикасынын курорттук-эс алуу мекемелеринин Өзбекстан Республикасынын ишканалары жана мекемелери, алардын кызматкерлеринин эс алуусун Ыссык-Көлдүн жээгинде жайланышкан пансионаттарда уюштуруп жаткандагы жигердүү кызматташтыгын, жана туристтердин санынын көбөйүшүүсүн эске алып, кыргыз тарабы “Ташкент-Тамчы (Ыссык-Көл)” маршрутундагы чартердик каттамдарды кайрадан баштоо боюнча сунушун киргизди. Андан сырткары, тараптар “Ош-Ташкент-Ош” багытындагы каттамдар жөнүндө маселелерди талкууга алышты.
