Жүк ташуучу унаа айдоочулары дөңгөлөктөрүнө чынжыр байлоого милдеттендирилди. Транспорт жана жол министрлигинин бул буйругу кыш мезгилинде жол кыймыл коопсуздугун камсыз кылуу максатында чыгарылганын министрликтин басма сөз кызматы маалымдады.
Буйрукка ылайык, кар жааган учурда чиркегичи бар жүк ташуучу автоунаалар дөңгөлөктөрүндө чынжыры жок жүрүшүнө тыюу салынат. Буйруктун аткарылышын көзөмөлдөө «Ош-Сарыташ-Эркечтам», «Жалал-Абад – Балыкчы», «Бишкек-Балыкчы-Нарын-Торугарт», «Бишкек-Ош» жолдорунун башкармалыктарына, жүктү жана көлөмдү көзөмөлдөө агенттигине жана Жол кыймыл коопсуздугун камсыз кылуу башкармалыгына тапшырылды.
Мындан тышкары жол департаментинин жетекчилигине көчкү түшүү коркунучу күч аймактарга алдын ала эскертүүчү белгилерди коюу милдеттендирилди.
