Мектеп окуучулары 8-апрелден тарта аралыктан окутулуп баштайт

Автор -

Өлкөдө 2020-жылдын 8-апрелинен баштап окуучулар аралыктан окутулуп баштайт. Бул туурасында бүгүн, 31-мартта билим министринин орун басары Надира Жусупбекова билдирди.

Анын айтымында, министрлик учурда видео сабактарды көрсөтүү боюнча телеканалдар менен иштешип жатат.

«Баластан» телеканалынан атайын пайдалуу жана таанып-билүүчү көрсөтүүлөр чыгарылып турат. Алардын ичинде балдарды мектепке даярдоо боюнча 480 сааттык программа жана башталгыч класстардын окуучулары үчүн видео сабактар бар», — деп белгиледи Надира Жусупбекова.

Ал эми, 5-9-класстардын окуучулары үчүн «Илим-Билим»  ЭлТР, «Пирамида» телеканалдарынан видео сабактар көрсөтүлөт.

«Биздин мугалимдер 16-марттан тарта окуучулар менен Zoom, Whatsapp интернет программалары аркылуу байланыш түзүүдө, мессенжерлерден алар видео сабактардын чыгуу убактыларын жана жүгүртмөлөрүн билдирип турушат», — деп кошумчалады министрдин орун басары.

Билим берүү жана илим министрлиги бардык окуучулар үчүн электрондук материалдарды иштеп чыкты. Башталгыч класстар үчүн электрондук материалдарды Ibilim порталынан тапса болот, ал эми 5-11-класстарга арналган материалдар «Билим булагы» порталына жүктөлдү. Баш-аягы кырктан ашык аудио жана видео материал даярдалган.

Билим берүү жана илим министрлигинин буйругуна ылайык,  ушул жылдын 16-мартынан 8-апрелине чейин жалпы билим берүү уюмдары, мектептен тышкаркы билим берүү уюмдары, кесиптик башталгыч, орто жана жогорку окуу жайлары үчүн мөөнөтүнөн мурда каникул жарыяланган.

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз!

Бөлүшүү