Республикалык клиникалык жугуштуу оорулар ооруканасында 22-апрелде саат 4:45те коронавирус жуктуруп алган 53 жаштагы аял каза тапты. Бул тууралуу оорукананын башкы дарыгери Гүлжигит Аалиевге таянып, АКИpress жазды.
Анын айтымында, аял ооруканага 5-апрелде жаткырылган.
«Буга чейин ал Кеминдеги аймактык ооруканада 1-апрелден 5-апрелге чейин дарыланган. Аялда коронавирустан тышкары кант диабети, жогорку тобокелчиликтеги гипертониялык оору, жүрөк оорусу жана башкалар болгон», — деген башкы дарыгер.
Кийинчерээк Республикалык штабдан ал бейтап оор абалда келип түшкөнүн жана кайра жандандыруу бөлүмүнө жаткырылып, ал жактан көз жумганын билдиришти.
Ошону менен Кыргызстанда коронавирус илдетинен каза тапкандардын саны 8 адам болду.
