Александр Лукашенконун 19-августтагы жарлыгына ылайык, беларус өкмөтү кайра дайындалды. Ага ылайык, бардык министрлер, анын ичинде күч кызматтарынын жетекчилери да өз ордуларында калышты. Өкмөт башчы болуп Роман Головченко кайра дайындалды. Тышкы иштер министри Владимир Макей, ички иштер министри Юрий Караев ордунда калды.
Бул аралыкта Беларуста президенттик шайлоонун жыйынтыгына нааразылык акциялары 11-күн катары менен уланды.
Батыш өлкөлөрү, Евробиримдик беларус бийлиги тарабынан демонстранттардын кууп таркатылышын жана аларга күч колдонулуусун сынга алышкан.
9-августтан бери уланып жаткан массалык акцияларда жүздөгөн киши жаракат алып, жети миңдей адам кармалды. Үч киши набыт болгону расмий кабарланды.
19-августта Евробиримдик Беларустагы шайлоонун жыйынтыгын тааныбасын жарыялаган. Мындан тышкары добуш бурмалоого жана нааразылык акцияларын күч менен басууга тиешеси бар адамдарга санкция салынарын билдирген.
9-августта өткөн президенттик шайлоодо Беларусту 1994-жылдан бери башкарып келаткан Александр Лукашенко добуштардын 80% алган. Бирок жарандык коом шайлоонун жыйынтыгы бурмаланган деп эсептейт.
