Кыргызстандын мурдагы президенти Алмазбек Атамбаев №47 колонияга которулду. Бул тууралуу жактоочусу Замир Жоошев кабарлады.
Анын айтымында, Атамбаев ачкачылыгын токтотту, азыркы кармалган жаза өтөө мекемесинин абалына нааразычылыгы жок.
Алмазбек Атамбаев 26-октябрда Бишкек шаарындагы №1 тергөө абагына которулган. Ага чейин УКМКнын тергөө абагында болчу.
Жактоочу Замир Жоошевдин айтымында, Атамбаевди №1 тергөө абагынын жер төлөсүндөгү суук, канализация иштебеген камерага киргизишкен. Ал буга нааразычылык иретинде ачкачылык жарыялаган.
Алмазбек Атамбаев 2019-жылдын 8-августунда атайын операция менен кармалган. Ал учурда үч кылмыш иши боюнча айыпталууда: Кой-Таш окуялары, кримтөбөл Азиз Батукаевдин түрмөдөн мыйзамсыз бошотулушу, мыйзамсыз баюу.
Батукаевдин иши боюнча соттук процесс өтүп жатат, акыркы отурум 16-ноябрга белгиленген.
Бишкекте парламенттик шайлоонун жыйынтыгынан кийин башталган нааразылык акциялары башаламандыкка айланып кеткен күнү Атамбаев да абактан бошотулган, 10-октябрда кайра камакка алынган.
