Бишкек шаарынын мэринин милдетин аткаруучу Балбак Түлөбаев аны кызматтан алууну сунуштап жаткан депутаттарга жооп берди.
Белгилей кетсек, бүгүн Түлөбаев ЖКнын Транспорт, архитектура жана курулуш комитетинин жыйынына келбей койгону үчүн депутаттар аны жана башка жетекчилерди кызматтан алуу сунушун президентке жөнөтмөк болушкан.
Калаа башчысы эл өкүлдөрүн мыйзамды окуп коюуга чакырып, аларга барып отчет берүүгө укуктуу эмес экенин белгиледи.
«Жогорку Кеңештин депутаттары Кубанычбек Жумалиев менен Рыскелди Момбековго кайрылат элем, мыйзамды ачып бир жолу окуп коюңуздарчы. Менин өзүмдүн парламентим бар — шаардык кеңеш. Эми ойлосоңуздар, килейген парламентке үч вице-мэрди чакырып жатат. Биздин ал жакка эмне тиешебиз бар? Өзүнүн өкмөтүн чакырып, маселелерин чече берсин. Мен мэрди кызматка беките турган шаардык кеңешке отчет берем. Мени иштен алуу чечими парламентке аброй алып келбейт, анысы мыйзамсыз. Ага күлүп эле коюш керек», — деди Түлөбаев.
Ошондой эле Түлөбаев мэр Жергиликтүү өз алдынча башкаруу жана Бишкек, Ош шаарларынын статусу жөнүндөгү эки мыйзам менен иштей турганын айтты. Аны менен катар баарын мыйзам чегинде иштөөгө чакырып, мыйзамсыз иштердин натыйжасында элдик толкундоолор болгонун белгилеп өттү.
