Төңкөрүш аракетине чейин эле коомдук ишмер Фетхуллах Гүлендин күнөөлөрүн далилдеген документтер жөнөтүлгөнүн Түркия президенти Режеп Тайип Эрдоган айтты.
«Учурда төңкөрүшкө байланышкан жаңы документтерди даярдап жатабыз. АКШ менен Түркиянын макулдашуусу Гүленди кармоого жана соттоого багытталганы менен ал дагы деле терррор уюмун башкарганын улантууда. Биздин талапты тоготпой койгон туура эмес», — деп Эрдоган кошмо штаттардын вице-президенти Жозеф Байден экөө катышкан маалымат жыйында айткан.
Ал эми Байден өз кезегинде Гүленди Түркияга өткөрүп берүүнү америкалык сот чечиши керек экендигин билдирген.
16-июлга караган түнү Түркияда аскерий төңкөрүш аракети болуп, 246 адам каза таап, 2 миңи жарадар болгон. Төңкөрүштү уюштурду деп оппозиционер Гүлен жана анын тарапташтары күнөөлөнүүдө. Учурда ал АКШда жашагандыктан бийлик аны кайтара албай убара.
