Ереванда жекшемби күнү демонстранттар менен полиция кагылышып, 15 киши ооруканага жеткирилди.
Алар оппозиция лидери жана парламент депутаты Никол Пашинян менен аялы кармалгандан кийин премьер-министр Серж Саргсяндын токтоосуз отставкага кетишин талап кылышкан.
Жекшембиде Армениянын премьер-министри Серж Саргсян оппозиция лидери Никол Пашинян менен жолуккан. Пашинян өкмөт башчы кызматтан кетиши керектигин айта баштаганда Саргсян сүйлөшүүнү андан ары улантуудан баш тартып, чыгып кеткен.
Демонстранттар нааразылык акциясын улантышууда. Чогулган элди кубалоо үчүн бийлик тарсылдатып үн чыгарган гранаталар менен түтүн чыгарган каражаттарды колдонгон.
Өлкөнүн мурдагыдай жалпы эл эмес, парламент шайлаган президенти Армен Саркисян 9-апрелде кызматка киришкен. Андан соң депутаттардын көпчүлүк добушу менен мурдагы президент Серж Саргсян өкмөт башчы болуп келген. 2015-жылдагы конституциялык реформадан кийин Арменияда премьер-министрдин ыйгарым укуктары кеңейтилип, президенттики азайган эле.
