Кайната – деген өзгөчө сүрү бар, бирок ошол эле учурда аталык мээрими да бар өзүнчө кадырман адам болот. Saat.kg кезекти кайнаталардын сапаттарына берет.
1Статусу жогорулайт
Кайната келиндүү же күйөө балалуу болгондо өзгөчө каада күтөт. Анткени анын статусу мурункудан да жогорулап, мурун ата эле болсо, эми «кайын ата» деген атка ээ болот.
2Келининен уялат
Келини кайнатасынан уялса, ал келининен уялып алдыман чыгып калбаса экен деп абайлап басат.
3Абайласа да келини алдынан чыгат
Кайната келини менен өчөшкөнсүп дааратканага баратып, эшиктен чыгып же кирип келатып күнүнө бери дегенде бир-эки жолу сүзүшөт.
4Кайнатанын образына киргичекти ыңгайсызданат
Жаңы келиндүү болгондо кенен-кесир басып тура албай, мурункудай үнүн бийик чыгара албай, көнгүчөктү ыңгайсызданат.
5Келинине болушат
Көбүнчө келинин кайненесинин жемесинен кайната сактап калат. «Ал деле бирөөнүн баласы да» деп болушуп турат.
6Кайнаталар камкор келет
Келинин сыйлап, бир чети аяп билгизбей кол кабыш кылат. Өзгөчө небере бакканга кайнаталардын жардамы чоң болот.
7Келинин мактайт
Келиндин жасаган тамагына биринчи болуп комплимент айткан адам ошол болот. Даамсыз болуп калса да мактайт жана тамшанып жейт.
8Душманындай жек көрөт
Алгач күйөө баласын жаман көрөт. Анткени анын алпештеп чоңойткон кызын менчиктеп алганына ичи ачышат.
9Кийин доско айланат
Сүрдүү көрүнгөнү менен кайната бара-бара күйөө баласына жакын болуп, башынан өткөн окуялары менен бөлүшүп жакын санаалашка айланат.
10Кайнатаны небереси башкарат
Небереси «мультфильм көрөм» деп чоң атасына жаңылык көрсөтпөй жаткан көрүнүш ар экинчи үй-бүлөдө кездешет.
