Мурунку президент Алмазбек Атамбаевдин ден соолугунун абалы канааттандырарлык. Ал түнү-күнү дарыгерлердин көзөмөлүндө турат. Бул тууралуу Улуттук коопсуздук мамлекеттик комитети (УКМК) тараткан маалыматта айтылат.
Учурда мурдагы президент ден соолугу боюнча эч кандай даттанган эмес.
23-мартта Кой-Таш окуясы боюнча сот отуруму Атамбаев өзүн начар сезгендиктен улантылбай, башка күнгө которулган, ошондон бери карантинге байланыштуу сот боло элек. Жактоочулар УКМКнын тергөө абагында отурган Атамбаевдин кан басымы кескин төмөндөп кеткенин жана муну тергөө абагынын дарыгери да тастыктаганын айтышкан.
