ЖКнын агрардык саясат, суу ресурстары жана экология боюнча комитети бүгүн Кант шаарында көчмө жыйын өткөрүштү.
Борбордун жетекчиси Сыргак Кенжеев лабораториянын имараты, банк, бажы кеңселери менен тааныштырды.
“Бул жер коргоо комитетинин балансында турат, биз 37 гектар жерин 15 жылга келишимдик негизинде алып, жылына 1 млн сом төлөйбүз. Бул жерге 200 000 тонна айыл чарба өнүмүн сактоо үчүн муздаткычы бар заманбап кампаларды курабыз”, — деди ал.
Анын айтымында, товарларды ЕАЭБ чөлкөмүнө экспорттогон ишкерлерге тейлөө көрсөтүүгө даяр, бирок алар 9 айдан бери ишке кирбей жатат.
Тармактык комитететин төрагасы Мирлан Бакиров мындай логистикалык борбор Кыргызстан үчүн абдан керектигин, анын иштеп кетишине ар тараптан көмөктөшүү зарылдыгын белгиледи.
“Импорттолуп келген тамак-аш ушул жерден документ алышы керек. Сыртка экспорттоодо жасалма документ менен чыгып, жүгү менен кайра кайтып келип, канчасы төгүлүп жатканын көрүп жүрбөйбүзбү. Алар ушул жерден текшерилмейин, сыртка чыкпашы керек”, — деп кошумчалады депутат.
Соңунда комитет мүчөлөрү тарабынан ЕАЭБ өлкөлөрүнө атамекендик айыл чарба өнүмдөрүн тоскоолдуксуз экспорттоону камсыз кылуу максатында, Чүй облусунун Ысык-Ата районундагы “ЮниЛаб” ЖЧК – логистикалык жана сертификаттоо борборун мамлекеттик колдоо боюнча тиешелүү чечим кабыл алынды.
