Балтика флотунун маалымат кызматы бейшемби күнү кечинде Балтика деңизинде Ка-29 транспорттук-аскер тик учагы кыйраганын тастыктады. Тик учакты сыноодон өткөрүп жүргөн эки учкуч мерт болду. Бул тууралуу РИА Новости маалымат агенттиги жазып чыкты.
«2018-жылдын 12-апрелинде Балтика деңизинин акваториясында сыноо учуулары өтүп жаткан маалда Ка-29 тик учагы кыйрады. Тик учакты жасаган ишкананын эки учкучу тең набыт болду», — деп айтылат билдирүүдө.
Учуу маалында катаал аба ырайы катталган эмес.
Кыйроо болгон жерде издөө иштери жүрүүдө, эл аралык деңиз куткаруу кызматтарындагы булак билдиргендей, жума күнү эки учкучтун биринин денеси табылды.
Ка-29 тик учагы 1980-жылдары Н. И. Камов атындагы конструктордук бюросу тарабынан иштелип чыккан. Ал кемелер үчүн деңиз аскерлер бөлүктөрүн жана жүктөрдү ташууга, ок атууда колдоо көрсөтүүгө багытталган.
