Украинанын Борбордук шайлоо комиссиясы бюллетендердин 95 пайыздан ашыгы саналып бүткөндөн кийин добуш берүүнүн жыйынтыктары боюнча жаңыланган маалыматтарды жарыялады.
Ага ылайык, куудул, актёр Владимир Зеленский шайлоочулардын 30,22%, өлкөнүн учурдагы президенти Петр Порошенко 15,93% жана оппозициялык «Батькивщина» партиясынын лидери Юлия Тимошенко 13,40% добушун алган.
Шайлоонун расмий жыйынтыгы 10-апрелге чейин жарыяланышы керек. Топтогон добуштары боюнча биринчи жана экинчи орун алган талапкерлер 21-апрелде экинчи турга катышат. Анын жыйынтыгы 1-майга чейин белгилүү болот. Украинада президент беш жылга шайланат.
