Премьер-министр уран кенинде ишти убактылуу токтотуп турууну тапшырды

Автор -

Өкмөт башчы Мухаммедкалый Абылгазиев Кызыл-Омпол уран кенинин ишин экологиялык экспертиза аяктаганга чейин токтотуп турууну тапшырды. Расмий кабарга ылайык, 22-апрелде премьер-министр «Кыргызстандагы ЮрАзия» ишканасынын ишмердигине байланыштуу кеңешме өткөрдү.

Өкмөттүн басма сөз кызматы билдиргендей, 2018-жылдын 31-декабрында кен казууга байланыштуу бардык жагдайларды изилдеп чыгуу максатында мекеме аралык жумушчу топ, 18-апрелде мекеме аралык комиссия түзүлгөн. Уран кенине байланыштуу бардык чечимдер комиссиянын ишинин жыйынтыгын эске алуу менен, экологиялык, техникалык экспертизалардан кийин кабыл алынат.

Коомчулукта Ысык-Көлдүн Көк-Мойнок айыл аймагындагы Кызыл-Омпол уран кенин иштетүүгө каршы маанай кийинки күндөрү күчөп кеткен. Жарандык активисттер «Биз Ысык-Көлдө уран кенин иштетүүгө каршыбыз!» деген петицияга онлайн кол чогулта баштаган.

Кенди чалгындап жаткан «Кыргызстандагы ЮрАзия» ишканасы — Орусия менен Кыргызстандын биргелешкен компаниясы. Анын 60 пайызы орусиялыктарга, 40 пайызы Кыргызстанга таандык.

Кенди чалгындоого лицензия 2010-жылы алынган. Чалгындоо иши 2012-жылы башталган. Лицензиянын мөөнөтү 2020-жылы 31-декабрда бүтөт.

2015-жылы Кызыл-Омполдун Таш-Булак тоо-кен участогу мамлекеттик баланска коюлган. Анда 1632 тонна уран, 3338 тонна торий, 33800 тонна цирконий жана 4102 тонна титан магнитинин запасы бар экени аныкталган.

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз!

Бөлүшүү