Үй камагындагы «Ата Мекен» партиясынын лидери Өмүрбек Текебаев мурдагы Убактылуу Өкмөттүн мүчөсү катары президент Сооронбай Жээнбеков менен жолугушууга расмий чакыруу албаганын маалымдады. Ал бул маалыматты массалык маалымат каражаттарынан укканын жана чакыруу болсо кабыл аларын айтты.
Текебаев Жээнбеков менен жолугуп калса кылмыш иши жөнүндө кеп козгобой турганын билдирди:
— Дүйнөдө жана Кыргызстанда болуп жаткан окуяларды талкуулайбыз. Бирок менин кылмыш ишим боюнча ал жакта кеп болбойт деп ойлойм.
2010-жылдын апрель окуясынан кийин түзүлгөн Убактылуу Өкмөттүн мүчөлөрү ишемби күнү президент Сооронбай Жээнбеков менен жолугушууну пландап жатышат.
Бул маалыматты «Азаттыкка» мурдагы премьер-министр, Убактылуу Өкмөттүн мүчөсү болгон Темир Сариев ырастаган. Ал өлкө башчы менен жолугушуу президенттик аппараттын демилгеси экенин белгилеп, азырынча конкреттүү эмне маселе талкууланары белгисиз экенин белгилеген.
10-сентябрда Убактылуу Өкмөттүн айрым мүчөлөрү үй камагына чыккан саясатчылар Өмүрбек Текебаев жана Дүйшөнкул Чотонов менен учурашып, өлкөдөгү саясий абал жөнүндө пикир алышкан.
Ал жолугушууга Убактылуу Өкмөттүн мүчөлөрү Роза Отунбаева, Темир Сариев, Кенешбек Дүйшөбаев, Азимбек Бекназаров, Эмилбек Каптагаев, Элмира Ибраимова, Болот Шер, Исмаил Исаков, Абдыганы Эркебаев, Өмүрбек Текебаев жана Дүйшөнкул Чотонов катышкан.
Жогорку сот 21-августта «Ата Мекен» партиясынын түрмөдө жаза мөөнөтүн өтөп жаткан лидери Өмүрбек Текебаев менен мурдагы министр, экс-элчи Дүйшөнкул Чотоновдун ишин жаңы ачылган жагдайларга байланыштуу карап, мурдагы чечимдердин баарын жокко чыгарган. 29-августта Бишкектин Биринчи май райондук соту камакта жаткан Өмүрбек Текебаев менен Дүйшөнкул Чотоновдун бөгөт чарасын өзгөртүп, сот залынан бошоткон.
12-сентябрдагы отурум сот процессин видеого тартууга тыюу салуу менен башталды. Андан кийин адвокаттар ишти кайра кароого негиз болгон жагдайларды тизмектеп, ишти кароо тартиби бекитилди. Соттук жараян 1-октябрга, саат 10:00гө жылдырылды.
Өмүрбек Текебаев менен Дүйшөнкул Чотонов «орусиялык жаран Леонид Маевскийден пара алды» деген көрсөтмөнүн негизинде, 2017-жылы ар бири сегиз жылдан түрмөгө кесилген.
