Чүй облусуна караштуу Токмок шаарында 19 жаштагы кызды ала качууга шектелип 2 жаран кармалды. Бул тууралуу ОИИББдан билдиришти.
2020-жылдын 11-январында Жети-Өгүз районунун ички иштер органдарына Токмок шаарынын тургуну арыз менен кайрылган. Анын айтымында, 11-январда анын 19 жаштагы кызын шаар көчөлөрүнүн биринен 2 жигит белгисиз унаа менен ала качып кетишкен.
Арыздануучу алардын артынан Ысык-Көл облусуна барып, Жети-Өгүз районунун айылдарынын биринен кызын тапкан. Аны алып кетип, дароо эле милицияга кайрылган.
Бул факт 175-берене (үйлөнүү максатында ала качуу) менен Кылмыш жана жоруктардын бирдиктүү реестрине катталган. Сотко чейинки өндүрүштүн материалдары андан аркы иш-чараларды жүргүзүү үчүн Токмоктун ички иштер органдарына өткөрүлүп берилген.
Токмоктун милициясы кылмышка шектүү катары Ысык-Көл облусунун 20 жана 27 жаштагы эки тургунун кармады. Алар Токмок ички иштер органынын убактылуу кармоочу жайына киргизилип, кайра сот тарабынан үй камагына чыгарылды. Сотко чейинки өндүрүш уланууда.
