Дүйнөлүк саламаттыкты сактоо уюму беткап тагынуу жөнүндө сунуштарын жаңылады. Бул туурасында бүгүн, 9-июнда, Республикалык штабдын брифинги учурунда белгилүү болду.
ДССУнун Кыргызстандагы өкүлчүлүгүнүн башчысы Назира Артыкованын айтымында, беткап тагынууну — ооруну алдын алуу чараларынын бири катары кароо керек.
- Коронавирус инфекциясынын кеңири таралуу шарттарында бардык медкызматкерлер жумуш учурунда беткап тагынуусу зарыл. Коронавирус илдети менен бейтаптар жаткырылбаган ооруканаларда, мисалы төрөт үйүндөгү же кардиологияда иштеген дарыгерлер дагы беткап тагынуусу керек.
- Вирус кеңири жайылган аймактарда, социалдык аралыкты сактоо мүмкүнчүлүгү жок учурда, 60 жаштан жогору жана өнөкөт оорулары бар адамдар беткап тагынып жүрүүсү керек.
- Калк коомдук жайларда да: жабык имараттарда, коомдук транспорттордо, дүкөндөрдө жана эл көп чогулган жерде беткап тагынууга тийиш.
- Калк арасында синтетикалык же пахта кездемесинен жасалган беткапты тагынууга болот.
- Бир гана беткап менен коронавирустан коргонуу мүмкүн эмес. Андыктан, социалдык аралык жана башка бекитилген санитардык талаптарды аткаруу кажет.
Ошондой эле, айрым сунуштар өзгөрүүсүз калды. Алар төмөнкүлөр:
- COVID-19 вирусунун симптомдору бар адам өзүн-өзү изоляция кылуусу керек.
- Коронавирус илдети тастыкталган учурда бейтаптар изоляцияга алынып, медициналык мекемеде дарылануусу зарыл. Ал эми алар менен байланышта болгон жарандар үй карантинине алынышы шарт.
- Оорулуу адам менен бир бөлмөдө болгон жана аны карап жаткан жарандар, үйдөн жана сыртка чыккан учурда дагы беткап тагынуусу зарыл.
- медкызматкерлер бейтаптар менен байланышта болгондо жана дарылоодо беткап менен өздүк коргонуу каражаттарын колдонуусу керек.
