Ошто каракчылыкка шектелип, кылмыштуу топтун мүчөсү кармалды (фото)

Автор -

Ошто 31 жаштагы жаранды сабап, капчыгын, травматикалык тапанчасын тартып алуу кылмышына катыштыгы бар дагы бир жаран кармалды. Бул тууралуу ИИМден билдиришти.

Кармалган жаран Ош облусунун Өзгөн районунун Т.И. аттуу 1986-жылы туулган тургуну болуп чыкты. Ал шериктери менен кылмыш жасоого шектелип, убактылуу кармоочу жайга киргизилди. ИИМдин  КМКнын Аймактар аралык башкармалыгынын маалыматы боюнча жаран Т.И. мурда  соттолгон. Ал уюшкан кылмыштуу топтун мүчөсү катары ИИМдин ыкчам  каттоосунда турат жана «положенец» криминалдык статуска ээ.

Азыркы учурда сотко чейинки өндүрүш жүрүүдө. Аталган кылмыш ишине
тиешеси бар башка жарандарды дагы кармоо боюнча тиешелүү чаралар
көрүлүүдө.

Окуянын чоо-жайы
2020-жылдын 11-январь күнү болжол менен 03:30 чамасында Ош шаардык
ИИБдин «Ак-Буура» шаардык милиция бөлүмүнө шаардык ооруканадан маалымат
түшүп, анда белгисиз адамдар кол салып, денесинен жаракаттарды алган бейтап түшкөндүгү маалымдалган.

Окуя болгон жерге ички иштер  органдарынын кызматкерлери келишип, жабырлануучунун өздүгүн аныктап, ал  Ош шаарынын жашоочусу, 1989-жылы туулган Р.У. аттуу жаран болуп чыккан.

Алынган маалымат боюнча, болжол менен түнкү саат 02:00 чамаларында
жаран Р.У. өзүнүн «Тойото-Камри» үлгүсүндөгү автоунаасы менен келе жатканда «Народный» дүкөнүнүн жанынан белгисиз адамдар жээкке  токтоттурушкан.  Белгисиз автоунаадан бир нече адам чыгып келишип, кол салышкан. «Тойото» автоунаасынын айдоочусун жерге кулатып,  буттары менен тепкилешкендиктен, жаак тараптын үч жеринен сынык алган.

Кылмышкерлер анын капчыгын, травматикалык тапанчасын алып белгисиз
тарапка изин жашырып качып кетишкен. Аталган факты КЖБРге катталып,
Кыргыз Республикасынын Жазык кодексинин 202-беренесинин 3-бөлүмүнүн
3-пункту (Каракчылык) менен сотко чейинки өндүрүш башталган.

Бир аздан кийин милиция кызматкерлери тарабынан аталган каракчылыкка
шектүү делип үч жаран, анын ичинде УКТнын активдүү мүчөсү катары ИИМдин
ыкчам каттоосунда турган «Казак» каймана аты менен белгилүү У.М.
кармалган.

Сотко чейинки өндүрүштүн жүрүшүндө жогорудагы бардык кармалган
жарандардын коомго коркунуч келтирген укукка жат аракеттерди жасоого
тиешеси бардыгы аныкталган. Топтолгон материал кийинки териштирүү үчүн
сотко жөнөтүлгөн.

Кыргыз Республикасынын ИИМдин КМКнын Аймактар аралык башкармалыгы
аталган кылмыш ишине тиешеси бар башка жарандардын кайда жүргөндүгүн
аныктоого жана кармоого багытталган тергөө иш-аракеттери менен
ыкчам-издөө иш-чараларын жүргүзүүнү улантышкан.

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз!

Бөлүшүү