Ибраева: Коронавирусту дарылоонун жаңы протоколуна 80 дары киргизилди

Автор -
Иллюстрациялык сүрөт

Медициналык жардам жана дары-дармек саясатын уюштуруу башкармалыгынын башчысынын милдетин аткаруучу Нургүл Ибраева 10-сентябрда коронавирусту дарылоо боюнча 4-протоколдун үчүнчүсүнөн айырмачылыгы тууралуу маалымат берди.

Анын айтымында, бул протоколдо пневмониянын коду бекитилди – U07.2. Андан тышкары ооруканада жана үйдө дарылоо деп экиге бөлүндү. Ошондой эле бейтаптарга декстаметазон сыяктуу дарыларды консилиумдун чечими менен гана  колдонуу чечими чыкты.

«Төмөнкү алгоритмдер иштелип чыкты:
1. Коронавирус жана өнөкөт оорулары бар бейтаптарды дарылоо боюнча;
2. Балдарды дарылоо боюнча;
3. Кош бойлуу жана жаңы төрөгөн аялдар үчүн алгоритм;
4. Амбулатордук дарылоо боюнча;
5. Кайра калыбына келтирүү (реабилитация) программасы», — деди Ибраева.

Коронавирусту дарылоо боюнча 3-протоколдо 56 дары-дармек бар болсо, жаңы протоколдо анын тизмеси 80ге жетти.

Кыргызстанда коронавирусту дарылоо боюнча расмий протокол март айынан бери төрт жолу өзгөрдү. Акыркысы сентябрь айынан бери колдонула баштады.

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз!

Бөлүшүү