Түндө Бишкек шаарында абал тынч болду. Бул туурасында комендатурадан кабарлашты.
Калаада ички иштер органдары, куралдуу күчтөр элдик кошуун менен биргеликте коомдук тартипти сактап, жарандардын коопсуздугун камсыздап жатат.
Саат таңкы 5:00дөн бери транспорттун жана жарандардын кыймылы кадимки абалда жүрүүдө. Мамлекеттик мекемелер менен ишкерлик объектилер толук иштеп жатат.
Милиция кырдаалды курчуткан жана чагымчылдыкты жараткан аракеттер боюнча фактылар болбогондугун айтты.
Эскерте кетсек, Кыргызстанда 4-октябрда парламенттик шайлоо өткөн. Эртеси анын жыйынтыгына нааразы болгондор аянтка топтолуп, анын аягы ызы-чуу, башаламандыкка айланган. Мындан улам, президент Сооронбай Жээнбеков 21-октябрга чейин баш калаага өзгөчө абал режимин киргизген. Азыр Бишкектин бир канча жеринде блокпосттор коюлуп, анда аскерий техника жана жоокерлер турат. Номери жок унаалар текшерилүүдө.
