Жаза аткаруу мамлекеттик кызматы мурдагы премьер-министр Сапар Исаков менен мурунку мэр Албек Ибраимовдун абакка кайтып келишин күтүп жатат. Бул тууралуу аталган мекеме маалымдады.
Маалыматка ылайык, Жазаларды аткаруу мамлекеттик кызматы тарабынан жүргүзүлгөн түшүндүрүү иштеринин натыйжасында, соттолгон Салайдин Авазов, Дамир Мусакеев, Айбек Калиев түзөтүү мекемелерине кайтарылган. Ал эми Жантөрө Сатыбалдиев ден соолугунун начарлап кеткендигине байланыштуу Жаза аткаруу мамлекеттик кызматынын кызматкерлеринин коштоосунда Улуттук Кардиология жана терапия борборунда жатат.
Жаза аткаруу мамлекеттик кызматынын мекемелерине келе элек соттолуучу Сапар Исаков, Албек Ибраимовго берилген өргүүнүн мөөнөтү аяктады.
«Кыргыз Республикасынын Өкмөтүнө караштуу Жазаларды аткаруу мамлекеттик кызматы Кыргыз Республикасынын Жазык-аткаруу кодексинин 97-беренесинин негизинде 2020-жылдын 6-октябрында түзөтүү мекемесинен чыгып, кайра мурда жазасын өтөгөн мекемелерге кайтып келүүгө уруксат берилген адамдарга кайрылат. Талаптар аткарылбаса, укук коргоо органдары тиешелүү чараларды көрүшөт», — деп билдирди мекеменин маалымат кызматынан.
