Өкмөт жыйынында президент Гурбангулы Бердымухамедов жаңы китебинин бет ачарын жасады.
Өлкө башчы басылманын алгачкы нускалары 21-октябрдагы кеңейтилген отурумда министрлерге берилерин баса белгиледи.
Китеп “Түркмөнстан” деп аталат. Жергиликтүү ММКлар билдиргендей, ал эгемендүүлүктү алгандан берки 25 жыл аралыгында түркмөн калкы жасаган барандуу иштерге арналган.
Быйыл эле президент ушуну менен сегизинчи жолу китеп жазды. Буга чейин: январда – “Даанышмандык булагы” (макал-лакаптардын жыйнагы), мартта – “Чай – дары жана эргүү”, апрелде – “Күлүктүн ылдам басыгы” (ахалтекин аттары туурасында), майда – “Асман кооздугу” (түркмөн килем токуу өнөрү туурасында), июлда – “Түркмөнстандын дары чөптөрү” китебинин сегизинчи бөлүгү, сентябрда – “Дүйнө музыкасы, достук жана боордоштук музыкасы” (музыкант Шүкүр бакшы тууралуу) басылмалары жарык көргөн.
