Мурунку президент Алмазбек Атамбаевдин №1 убактылуу кармоочу жайдагы ( СИЗО-1) бир нече тарапташынан коронавируска ПЧР анализ алынды. Бул тууралуу Жазаларды аткаруу мамлекеттик кызматынан билдиришти.
Мурунку премьер-министр Сапар Исаков, экс-депутаттар Равшан Жээнбеков жана Мээрбек Мискенбаев, Президенттик аппараттын мурдагы жетекчиси Фарид Ниязов, УКМКнын 9-кызматынын мурунку кызматкери Канат Сагымбаев, ошондой эле Фархат Баабиев, Канат Осмоналиев жана Рыспек Карыпбек уулунан кечээ, 12-майда, анализ алынган.
«Баарынан COVID-19га карата ПЧР анализ алынды. Баары терс жыйынтыктарга ээ болду», -деп билдирет мекеме.
Эскерте кетсек, буга чейин УКМКнын 9-кызматынын мурунку кызматкери Канат Сагымбаев өзүн жаман сезип жатканын жана дагы 13 камералашында сасык тумоо сыяктуу белгилер болуп жатканын билдирген. Алардын ден соолугун текшертүү өтүнүчүн ЖАМК жетекчилиги укпай жатканын кошумчалаган.
