Казакстанда соңку эки күндүн ичинде «коронавирустук инфекциянын белгиси бар» пневмонияга чалдыккандар кайра көбөйдү. Бүгүн, 4-сентябрда өлкөнүн Саламаттык сактоо министрлиги акыркы бир сутка ичинде өпкөсү кагынган 481 адам жаңы катталганын, төрт бейтап көз жумганын билдирди. Бир күн мурда пневмонияга чалдыккандардын саны 571 кишиге жеткен болчу. 2-сентябрда өпкөсү кагынган 27 гана адам аныкталган эле.
Казак бийлиги коронавирус себеп болгон пневмонияны 1-августтан тартып каттай баштаса да, аны COVID-19 илдетинен өзүнчө санап келет. Андан бери Казакстанда пневмонияга чалдыккандардын саны 26 803 адамга жетти. 305 киши көз жумду.
Ал эми анализинен коронавирус табылган адамдарды кошкондо бейтаптардын жалпы саны 133 миңге чукулдады. Баш-аягы Казакстанда пандемия маалында 1900дөн ашуун адам көз жумду.
Казакстан 1-сентябрдан тартып карантин чараларын жумшартып, спортзал, бассейн, театр, музей жана улуттук парктардын иштешине уруксат берген.
