Бишкектин «Ала-Тоо» аянтында унаалардын кыймылы убактылуу чектелет. Бул тууралуу Патрулдук милиция кызматынан билдиришти.
Алардын маалыматына караганда, бул президенттик шайлоонун жыйынтыгына карата майрамдык иш-чаранын өткөрүлүшүнө байланыштуу.
Чүй проспектиси саат 13:00дөн тарта белгисиз убакытка чейин жабык болот.
Бишкек мэриясынан иш-чаранын уюштуруучулары уруксат алышканын билдиришти.
«Жалпы бөлүмгө Садыр Жапаровдун штабынан концерт уюштурулары тууралуу билдирүү түштү. Биз тараптан санитардык нормаларды сактоо, элдин көп топтолушуна жол бербөө сунушталды», — дешти мэриядан.
Баш калаа мэриясынын маалыматына караганда, концертке кеткен чыгымды Садыр Жапаровдун штабы каржылайт.
Эскерте кетсек, кечээ, 10-январда Кыргызстанда президенттик шайлоо өткөн. Алдын ала маалымат боюнча Садыр Жапаров алдыда.
