Европа Чемпионаты 10-июнда башталып, бир айга созулат. Францияда өтчү оюндарды кыргызстандыктар түз эфирде көрө алышат.
Чемпионатты «КТРК спорт» жана НТС телеканалдары түз көрсөтүп турат. Ал эми КТРК кээ бир учурларда гана эфирден берет.
Коомдук телерадиоберүү корпорациясынын спорт бөлүмүнүн редактору Шайырбек Араповдун айтымында, лицензия алган жалгыз КТРК болгондуктан, бардык кафе-ресторандар жана кабелдик каналдар КТРКдан алып көрсөтүшөт.
Ошондой эле, НТС да КТРКдан сублицензия менен (ретрансляция) алып берүүгө уруксат алган.
Футбол майрамы 10-июндан 10-июлга чейин уланат. Чемпионатка бардыгы болуп 24 команда катышат. Франция менен Румыния беттешкен алгачкы оюн биздин убакыт боюнча түнкү саат 1де башталат.
