Эртең, 14-сентябрь күнү Бишкек шаарында Түрк тилдүү өлкөлөрдүн Парламенттик Ассамблеясынын (ТҮРКПА) Социалдык, маданий жана гуманитардык маселелер боюнча комиссиясынын 6-жыйыны, Айлана-чөйрө жана жаратылыш ресурстары боюнча комиссиясынын 4-жыйыны болот. Аны менен катар Социалдык, маданий жана гуманитардык маселелер боюнча комиссиясынын 6-жыйынынын алкагында кино жана анимация жаатында кызматташуу боюнча семинар өткөрүлөт. Семинарга ТҮРКПАга мүчө-мамлекеттердин Маданият министрликтеринин өкүлдөрү, кино жана анимация тармактарындагы адистер, режиссерлор, аниматорлор катышмакчы.
ТҮРКПАнын Социалдык, маданий жана гуманитардык маселелер боюнча комиссиясынын 6-жыйынында Түрк тилдүү өлкөлөрдө түрк маданиятынын, мурасынын бир бөлүгү болуп саналган кино жана анимация жаатында тажрыйба алмашуу, мыйзамдык базаларды аныктоо менен өнүктүрүү боюнча талкуу жүрөт.
Ал эми Айлана-чөйрө жана жаратылыш ресурстары боюнча комиссиясынын 4-жыйынында генетикалык жактан өзгөртүлгөн организмдердин (ГМО) жайылышынын кесепеттери боюнча маселе каралмакчы.
Аталган комиссиялардын жыйындарында талкууланган маселелер боюнча сунуштама кабыл алынып, ТҮРКПАнын алдыда боло турган пленардык жыйынына сунушталат.
Иш-чараларга ТҮРКПАга мүчө-өлкөлөр – Азербайжан, Казакстан, Кыргызстан жана Түркиянын парламент депутаттары катышат.
