АКШнын президенти Дональд Трамп Аргентинада өтө турган «Чоң жыйырманын» саммити маалында Орусия президенти Владимир Путин менен жолукпай турганын билдирди.
Мындай чечимин Трамп Орусия чек арачылары тарабынан украин аскер кемелеринин кармалышы жана камалган украин суучулдарынын кое берилбей жатышы менен түшүндүрдү. Ал Путин менен бул абал жөнгө салынгандан кийин жолуга турганын кошумчалады.
Based on the fact that the ships and sailors have not been returned to Ukraine from Russia, I have decided it would be best for all parties concerned to cancel my previously scheduled meeting….
— Donald J. Trump (@realDonaldTrump) November 29, 2018
Орусиянын президентинин басма сөз катчысы Дмитрий Песков орус басылмаларына Путин менен Трамптын Аргентинадагы пландалган жолугушуусу болбой калганы тууралуу маалымат Кремлге келе электигин айтты.
Шаршембиде АКШдагы украин диаспора өкүлдөрү Трампты «Чоң жыйырма» саммитинде Путин менен жолугуудан баш тартууга чакырышкан. Бүгүн Кремль жолугушууга даярдыктар дале жүрүп жатканын билдирген. Reuters агенттиги Кремлдин документтерине шилтеме кылып, жолугушуу 1-декабрда Москва убактысы боюнча 17:30да башталып, эки саатка созулмактыгын жазды.
Трамп менен Путиндин толук форматтагы жолугушуусу быйыл июлдун ортосунда Хельсинкиде өткөн. Андан кийин эки өлкө лидерлери ушул айда Биринчи дүйнөлүк согуштун аяктагандыгынын 100 жылдыгына арналган Париждеги иш-чара маалында кыска маектешкен.
Мурдараак АКШнын Мамлекеттик департаменти ЕБ өлкөлөрүн украин суучулдарынын кармалышына байланыштуу Орусияга каршы киргизилген санкцияларды катаалдаштырууга жана «Түндүк агым-2» деп аталган биргелешкен энергетикалык долбоорду кайра карап чыгууга чакырган.
