Чүйдүн Аламүдүн райондук соту Бурулай Турдаалы кызынын өлүмү боюнча Жайыл райондук ички иштер бөлүмүнүн кызматкерлерине карата ишти карады. Бул жолку отурумда автомат көтөргөн жана түнкү күзөттө турган милиция кызматкерлери сурак берди. Дээрлик үч сааттан ашык созулган сот процессинде жабырлануучу тарап жана прокурорлордун берген суроолорунун көбү милиция кызматкерлеринин милдеттери жана жоопкерчилигине байланыштуу болду.
Кызматкерлердин видео көзөмөлдүн өчүп калганы жана милдеттери туурасында суроолорго так жооп бере албай жатканы талаш жаратты.
