«Коопсуз шаар» долбоору ишке киргизилген соң жол кырсыктарынан жабыркагандардын саны өткөн жылдын көрсөткүчтөрүнө салыштырмалуу 44,4% кыскарды. Бул тууралуу Кыргыз Республикасынын ички иштер министри Кашкар Жунушалиев Кыргыз Республикасынын Өкмөтүнүн кезектеги жыйынында «Коопсуз шаар» долбоорун ишке ашыруу маселесин кароо учурунда билдирди.
Анын маалыматы боюнча, жол кыймылынын эрежелерин бузуулардын саны 37,5% кыскарган, 38 миң 385 тийиштүү протокол толтурулган. 40 миң 586 бузуу катталып, алардын ичинен 15 миң 411 айыппул 15 күндүн ичинде 20 млн 202 миң сом суммасында төлөнгөн.
Премьер-министр Мухаммедкалый Абылгазиев өзгөчө белгилегендей, бул долбоорду ишке ашыруунун максаты айыппулдун эсебинен көп каражат жыйноо эмес, жарандардын – жол кыймылынын катышуучуларынын коопсуздугун камсыздоо жана адам өмүрлөрүн сактоо болуп саналат.
Анын айтымында, айыппулдарды төлөөдөн түшкөн каражаттардын бөлүгүн тез жардам кызматтарынын техникалык абалын жакшыртууга жумшоо зарыл.