Владивостоктун Русский аралындагы Ыраакы Чыгыш федералдык университетинин кампусунда Орусиянын президенти Владимир Путин менен Түндүк Кореянын лидери Ким Чен Ындын жолугушуусу өтүүдө.
Эки саатка созулган бетме-бет сүйлөшүү маалында мамлекет башчылар Корей жарым аралындагы абалды жакшыртуу боюнча аракеттерди талкуулашты.Путиндин айтымында, жолугушуу маңыздуу өттү. Өз кезегинде Ким Чен Ын сүйлөшүүлөрдү мазмундуу деп атап, Орусияга келгенине кубанычта экенин кошумчалады.
Эми жогорку деңгээлдеги сүйлөшүүлөр кеңири курамда уланат. Анын жүрүшүндө лидерлер Корей жарым аралындагы өзөктүк көйгөйдү чечүүнүн жолдорун, ошондой эле эки тараптуу мамилелердин өнүгүшүн талкуулайт деп күтүлүүдө.
Азырынча сүйлөшүүлөрдүн мазмуну ачык жарыялана элек. Бирок «Коммерсант» гезити менен маектешкен эксперттердин пикиринде, учурдагы абалды жана жолугушууларга каралган убакытты эске алганда, бул сүйлөшүүлөрдөн өтө деле чоң нерселерди күтүүгө болбойт. Кремль эки лидердин жолугушуусунан кийин биргелешкен билдирүү жасалбай жана документтерге кол коюлбай турганын ырастады. Бирок Орусия президенти журналисттердин алдына чыгып, саммиттеги таасирлери менен бөлүшөт деп күтүлүүдө.
Жабык өткөн сүйлөшүүлөрдүн алдында Путин Ким Чен Ындын Түштүк Корея менен диалогду өнүктүрүү жана АКШ менен мамилелерди оңдоо боюнча аракеттерин кубаттай турганын билдирди.
Бул Владимир Путин менен Ким Чен Ындын тарыхтагы алгачкы жолугушуусу. Түндүк Кореянын лидери буга чейин Орусияга бир дагы жолу келген эмес. Эки өлкөнүн башчылары акыркы жолу 2011-жылы жолугушкан. Анда Дмитрий Медведев Түндүк Кореянын азыркы лидеринин атасы Ким Чен Ир менен Улан-Удэ шаарында сүйлөшүүлөрдү өткөргөн.
Быйыл февралда Ханойдо Түндүк Корея лидери менен АКШ президентинин жолугушуусу өткөн. Анда Пхеньяндын өзөктүк программасын толук токтотуу жана өлкөгө киргизилген америкалык санкцияларды алуу маселеси талкууланган. Бирок ал жолугушуу ийгиликсиз аяктап, Дональд Трамп менен Ким Чен Ын биргилишкен декларацияга кол коюшкан эмес.
