Жактоочу: Алмазбек Атамбаевди жакындары менен жолуктурбай жатышат

Автор -

Мурунку президент Алмазбек Атамбаевге жакындары менен жолугушууга уруксат бербей жатышат. Бул тууралуу анын жактоочусу Замир Жоошев Facebook социалдык тармагындагы баракчасында жазды.

Анын айтымында, акыркы жолу мурунку президент уулу жана жубайы менен 17-октябрда жолуккан. Бирок, 18-ноябрда Биринчи Май райондук сотунун судьясы Эмилбек Каипов негизсиз эле мурунку президенттин үй-бүлөсүнүн жолугушууга уруксат берүүнү сураган арызын четке какты.

«Камакта кармоонун тартиби жана шарттары» Мыйзамына ылайык, судьянын жазуу түрүндөгү уруксатынын негизинде шектүүгө туугандары менен ай сайын (үч сааттан) экиден кем эмес жолугушуу берилиши керек. Эң башкысы- бүгүнкү күндө Алмазбек Атамбаевдин үй-бүлөсү менен жолугуусуна уруксат берүүдөн баш тартууга бир дагы негиз жок».
Замир Жоошев

Эске салсак, УКМКнын атайын кызматы 7-августта Алмазбек Атамбаевдин Кой-Таштагы үйүн басып алууга аракет кылган. Бирок, операция ийгиликсиз болгон. Башаламандык маалында 45 киши жаракат алган. «Альфанын» кызматкери октон каза тапкан.

8-августта атайын операцияны ИИМдин атайын бөлүмчөсү колго алган, жыйынтыгында мурунку президент багынып берди. Ал УКМКнын тергөө абагына 26-октябрга чейин камакка алынды. Алмазбек Атамбаевге укук коргоо органдарына карата зомбулук көрсөтүү, адам өлтүрүү, барымтага алуу, массалык башаламандык уюштуруу, жемкорлук айыбы тагылууда.

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз!

Бөлүшүү