Эгер АКШ быйыл июнда жетишилген макулдашууларды аткарса, анда Түндүк Корея өлкөнүн эң башкы өзөктүк комплексин бузууга даяр. Бул тууралуу Ким Чен Ын Түндүк жана Түштүк Корея лидерлеринин ортосундагы сүйлөшүүлөрдүн экинчи күнүнүн жыйыныгы тууралуу айтып жатып билдирди.
Ким Түштүк Корея президенти Мун Чжэ Ин менен жолуккандан кийин «Биз Корей жарым аралын өзөктүк куралсыз, тынч жана эркин кылабыз деп макулдаштык», – деп билдирди.
АКШнын президенти Дональд Трамп Твиттерге бул жолугушуунун жыйынтыктарын кубаттаган билдирүү жазды.
Эки Корея лидерлеринин ортосундагы үчүнчү саммиттин жыйынтыгы менен тараптар бир нече макулдашууга жетишти. Аларга ылайык, аскердик чыңалууну азайтуу үчүн эки өлкөнүн ортосунда буфердик аймактар түзүлүп, 11-декабрга чейин демилитаризацияланган аймактагы 11 кайтаруу посту жабылат.
Мындан тышкары демаркацияланган аскердик чийиндин үстүндө учуусуз аймак түзүлөт. Ал учактарга, тик учактарга жана дрондорго тиешелүү болот. Ошондой эле Түндүк менен Түштүк Корея 2032-жылкы жайкы Олимп оюндарын өткөрүүгө чогуу билдирме жөнөтүшөт. Ошол эле маалда жолугушуу маалында эки өлкө лидердери Түндүк Кореядагы адам укуктарынын абалы тууралуу сөз кылышкан жок.
