Рио-де-Жанейро шаарында өткөн Олимп оюндарынын чемпиону, казакстандык суучул Дмитрий Баландин Словениядагы эл аралык мелдеште төртүнчү алтын медалын утту. Бул тууралуу Казакстандын Улуттук олимпиадалык комитети билдирди.
Маалыматка караганда, казак суучулу төртүнчү алтын медалын брасс ыкмасы менен 100 метрге сүзүү жарышындагы жеңиши үчүн алды. Ушул эле ыкма боюнча жарышта казакстандык Аделаида Пчелинцева экинчи орун алса, Диана Назарова 50 метрлик аралыкка чалкалап жарышууда биринчи орунга татыган.
Мурдараак Баландин суучулдар Александр Варакин, Адилбек Мусин, Адиль Каскабай менен биргеликте комбинациялык эстафета жарышында жеңишке жеткен.
Буга чейин 23 жаштагы Баландин 50 жана 200 метрлик аралыктагы жарыштарда биринчи келген. Словениянын Крань шаарында өтүп жаткан бул мелдештин жеңүүчүлөрүнө дүйнө биринчилигине жана Олимп оюндарына жолдомолор берилет.
