Азамат Жаналиев тарткан экс-президент Алмазбек Атамбаевдин сүрөтү сүрөтчүгө кайра кайтарылып берилет. Бул туурасында КСДП партиясынын расмий өкүлү Кундуз Жолдубаева, сүрөтчүнүн УКМКга кайрылуусуна жооп кылып билдирди.
Анын айтымында, бул сүрөттү тарткан Жаналиев эмгекти мурунку президентке «белек» катары Икрамжан Илмиянов аркылуу берип жиберген.
«Башында ал КСДПнын кеңсесине Алмазбек Атамбаевдин мык жана жиптен тартылган сүрөтүн белек катары калтырып кеткен. Бирок, бир нече жумадан кийин үй-бүлөлүк көйгөйлөрүн шылтоолоп, белекти сатып алууну суранып баштады. Анын кайра-кайра кайрыла бергенинен Икрамжан Илмиянов сүрөтчүнү кабыл алууга макул болуп, эмгеги үчүн 2500 доллар төлөп берген. Ал кезде сүрөтчү ушул акчаны алганына кубанып, үстүнө дагы акча кошууну оозанган да эмес. Буга күбөлөр да бар», -дейт Жолдубаева.
Анын айтымында, Азамат Жаналиевдин дагы төлөнө турган акча жөнүндө жана башка «коллекциялык картиналар» жөнүндө караандабаган калпы мындай жалган жалаа жапканы үчүн кылмыш жоопкерчилигине тартууга негиз болуп бере алат.
«Биз Илмиянов Жаналиев менен оозеки же кагаз жүзүндө эч кандай макулдашуу түзбөгөнүн, сүрөтчүнүн келишим тууралуу айткандары жомок экенин баса белгилеп кетебиз. Ал эми, «Сауд Аравиясынын ханзаадасына жөнөтүлгөн» картиналар тууралуу башкы консулдук жооп бере алат. Илмиянов ал картиналарды көргөн да эмес, аларды бирөөгө жеткирип берүүгө милдеттенме да алган эмес. Ал эми сатуу тууралуу сөз да жок. Сүрөтчүнүн кайра-кайра суранганынан, ал консулдуктун кызматкерлерине Жаналиевдин кандайдыр-бир өтүнүчү бар экен деген сөздү гана кабарлоого макул болгон. Азамат Жаналиев алган 2500 долларын кайтарып берсин, биз ага портретти кайтарып беребиз. Андан сырткары, мындан мурун да «акчага берилген белегин»- дагы бир ушундай сүрөттү кошуп беребиз. Кайтарылган акчалар «Апрель» коомдук фондунун эсебине киргизилет. Бул акчаны чындап муктаж адамдарга бергенибиз жакшы эмеспи», — деди Кундуз Жолдубаева.
Эскерте кетсек, кечээ социалдык тармактарда экс-президенттин мурунку кеңешчиси Икрамжан Илмияновдун үстүнөн УКМКга арыз түшкөнү тууралуу маалымат тараган. Анда сүрөтчү 15 миң долларга сатууга ниеттенип жаткан картиналарын Илмиянов тартып алууга аракет кылган деп айыптаган. Ошондой эле Атамбаевдин портретин 10 миң долларга сатып алам деп коюп, 2,5 миң доллар гана берип койгонун жазган.
Ал эми сүрөтчү Азамат Жаналиев Кундуз Жолдубаеванын айткандары калп деп чыкты. Жаналиев өз социалдык баракчасына төмөндөгүдөй билдирүү калтырган.
«Кундуз Жолдубаева, кантип калп айтып жатасыз? Сиз ошол Илмиянов И.С. менен мен жолукканда болдуңуз беле? кайдагы күбө? Кудайдан корксоңор боло! «Атамбаевдин акчасын бер, анан сүрөтүн алып кетесиң»,-депсиңер. Андай болсо Илмиянов И.С мага Дубайдагы сүрөттөрүмдүн акчасын берсин, болгонун-болгондой, анан мен Атамбаевдин сүрөтүн алып кетем. Эмнеге Дубайдагы сүрөттөрүмдү Илмиянов И.С. берип салат? Кандай акысы бар? Же эмне ал ханзааданын өкүлүбү? Бекер берген-деп жазыпсыңар? Бекер мен Илмияновко бериптирминби? Мен ханзаада Хамданга бергем, ал мени чакырган, менин ордума акем барып өзүнүн проектисин киргизген. Аны мен кийин билдим. Ошондой болмок беле? Кана адилеттүүлүк! Мен эмне асмандан түшкөн акчаны сурап жатамбы? Мен маңдай терим менен тапкан акчамды сурап жатам! Бергиле элдин башын айлантпай!»,-деп билдирген Жаналиев.
