Орусияда 19 аялды өлтүргөн милиционер экинчи жолу өмүр бою эркинен ажыратылды

Автор -
216

Новосибирск облустук соту мурдагы милиция кызматкери Евгений Чуплинскийди 19 аялды өлтүргөндүгү үчүн экинчи жолу өмүр бою эркинен ажыратты. Ага карата быйыл 6-мартта чыгарылган биринчи өкүмдү Жогорку соттун коллегиясы 11-сентябрда жокко чыгарган.

Коллегия мүчөлөрү айрым кылмыштар 1990-жылдары жасалгандыгын белгилеп, өкүм чыгарууда сот алардын эскирүү мөөнөтүн эске алган эмес деп тапкан.

Тергөө Чуплинский 19 аялды жиликтеп, мыкаачылык менен өлтүргөн деп эсептейт. Болжол менен ал кылмыштарды 1998-2005-жылдар аралыгында, Новосибирск шаарында милиция кызматкери болуп иштеп жүргөн кезде жасаган. Тергөөнүн маалыматы боюнча кылмышкер сойкулардын кызматынан пайдаланып, кийин аларды өлтүрүп жүргөн.

Чуплинский пенсияга чыккандан кийин 2016-жылы кармалган. Анда анын күнөөсү заманбап молекулярдык-генетикалык изилдөөлөрдүн жыйынтыгында далилденген. Ага чейин далилдер жетишпегендиктен, аны кармоого негиз табылбай келген.

Чуплинский кармалары менен дароо күнөөсүн мойнуна алып, тергөө менен кызматташа баштаган. Кылмыш болгон жергелерге барып, кимди кандай өлтүргөнүн айтып берген. Психологиялык экспертизадан өткөрүлүп, дарыгерлер аны акыл-эси ордунда деп табышкан.

Бирок былтыр апрелде мурдагы милиция кызматкери кайрадан күнөөсү жок экенин айтып чыккан. Анын туугандары менен жакындары бул иш атайын уюштурулган болушу мүмкүн деп эсептешүүдө.

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз!

Бөлүшүү