Жакында Айлана — чөйрөнү коргоо жана токой чарбачылыгы боюнча мамлекеттик агенттикте бир нече жылдан бери уланып келаткан башаламандыктар туурасында КРнын Коопсуздук кеӊешининин жумушчу тобунун кароосуна алынды.
Топ президентке бул мекеменин жетекчилигин толук алмаштыруу сунушун киргизди. Аталган Мамагенттиктин директору Абдыкалык Рустамовду тоо — кен компаниялардын жетекчилери Чапаев деп коюшат. Бул жарандык согуштун баатыры, кийинчерек атактуу тасмадагы даӊктуу кол башчы эмеспи.
Рустамовду өзүнүн революциялык ураандарына жамынып алып (Апрель окуяларынын активдүү катышуучусу), бирок иштин көзүн абдан начар билгендигинен улам ушундай ылакап атка кондурушкан. Айтор, кылычты оӊду солду шилтегенди гана билет дегендей кеп. Эми ылакап ат бергендер эмне айтып жаткандарын жакшы билишет, анткени алардын долбоорлоруна макулдук берип турган Агенттик болгон соӊ, Рустамов менен бат-баттан көрүшүп турушат эмеспи.
Мындай мекемедеги директордун орду абдан майлуу-сүттүү, анткени ири чет өлкөлүк гранттар ушул мекеме аркылуу өтүп турганынан тартып, кызыл китепке кирген жаныбарларды «илимий максаттарда» атып турууга уруксат бергенге чейин тескеп турат. Бирок бул жолкусунда Коопсуздук кеӊеши мындай иштердин бир четин гана көтөрдү. Маселен, Айлана — чөйрөнү коргоо жана токой чарбачылыгы боюнча мамлекеттик агенттиктин кызматкерлеринин ат тезегин кургатпай, чет элдик иш сапарларга чыгып турушу ойдогудай натыйжа бербей жатканы айтылды.
[ads-quote-center cite=’деп айтылды Коопсуздук кеӊешинде.’] «Иш сапарлар талдоого алынбайт, алардын натыйжалары пайдаланылбайт. Иш сапарлардын чыгымдарына бөлүнгөн бюджеттик жана донорлук акча каражаттары негизсиз сарпталууда. Чет өлкөгө мурда барган кызматкерлер улам бара берет, кээде гана мекемеден компетенттүүлүгү жок, аткарган милдети боюнча пландаштырылган иш сапарлардын тематикалары менен кез келбеген кызмат адамдарды жөнөтүлөт»[/ads-quote-center]Буга мисал катары, Жумушчу тобу төмөнкү фактыны келтирди. АЧКТЧМАнын штаттан тышкары кызматкери 2018-жылдын ичинде эле мамлекетгик органдын эсебинен 7 жолу чет мамлекеттерде өткөн эл аралык кеӊешмелерге, форумдарга, семинарларга жана башка иш-чараларга катышып келген.
Мындан тышкары, өткөн жылы АЧКТЧМАнын директору Рустамовдун айдоочусу жана жардамчысы милдетин кошо аткарган адамы Женева шаарына сапарга жөнөтүлгөн. ТИМге бул сапар туурасында билдирилген эмес, бул дагы бир тартип бузуу болуп саналат.
Кыскасы, Коопсуздук кеӊеши президентке Мамагенттиктин директору, баса, маалым болгондой, премьер-министр Абылгазиевдин эски досу Рустамовду кызматан бошотууну сунуштады. Премьер мындай кадамга бара алар бекен? Аны жакында көрөбүз. Мамлекет жетекчилеринин кимдин ким экенине карабай, коррупция менен аёосуз күрөшөбүз дегени ушинтип эле текшерилип калууда.
Биздин Чапай, сууга чөкпөс да, отко күйбөс Рустамовго тие алышабы деги?
Булак: «Ачык саясат» гезити. №15 (358). 26-апрель, 2019-жыл.
