Өзбекстандын Самарканд облусундагы эки айылды тейлеп келген төрөт үйү жабылып, аймактагы кош бойлуу аялдар үчүн олуттуу көйгөйлөр жаралууда.
Облустук саламаттык сактоо башкармалыгынан билдиришкендей, айылдагы төрөткана адискөй кызматкерлердин жана медициналык жабдуулардын жетишсиздигинен улам жабылган.
Жергиликтүү тургундардын айтымында, айыл райондун борборунан 30-40 чакырым алыстыкта жайгашкандыктан, кош бойлуу келиндер көпчүлүк учурларда үйлөрүндө көз жарууга аргасыз болушат.
Айылдыктар төрөткананы кайра ачып берүү өтүнүчү менен мамлекеттик органдарга кайрылып, Самарканд облустук саламаттык сактоо башкармалыгынын өкүлдөрү менен жолугушкан. Бирок алар төрөт үйүнүн ачылар-ачылбасы боюнча так жооп беришкен эмес.
Расмий маалыматтарга караганда, аталган төрөткана тарабынан тейленип келген Мойлисой жана Куксой айылдарында 35 миң адам жашаса, алардын тогуз миңин бойго жеткен кыз-келиндер түзөт.
