Өзбекстанда тилемчилик кылгандар жана майыптар менен кары адамдарды пайдаланып мындай «мыйзамсыз бизнес» жүргүзгөндөр жоопко тартыла баштайт. Бул тууралуу нормативдик-укуктук актылар талкуулана турган порталга жарыяланган документте жазылган.
«Аэропорттордо, автобекеттерде, сейил бактарында, базарларда жана соода комплекстеринин аймактарында тилемчилик кылгандар 360 сааттык коомдук жумуш аткаруу же бир жылдан үч жылга чейинки мөөнөткө эркинен ажыратуу жазасы менен жазаланат» – деп айтылат документте.
Мындан тышкары тилемчилик үчүн эрезеге жете элек балдарды, карыларды, майыптыгы бар жана психикалык жактан оорулуу адамдарды пайдалануу үчүн 480 саат коомдук жумуштарды аткаруу же үч жылдан беш жылга чейин эркинен ажыратуу жазасы колдонулушу мүмкүн.
