Өзбекстандын мурдагы президентинин кызы Гүлнара Каримова гумандуу болуу суранычы менен Шавкат Мирзиёевге кайрылды. Ал өзүн начар сезип жатканын айтып, чет өлкөлүк банктарда сакталган 686 млн долларынан баш тартарын билдирген.
Каримованын кайрылуусун анын кызы Иман Каримова “Инстаграмдагы” баракчасына жарыялады.
Түрмөдө жазасын өтөп жаткан Каримова Өзбекстандагы 1,2 млрд долларга тете активи мамлекеттин карамагына өткөнүн кошумчалаган.
Кайрылууда чет өлкөлүк банктарда 131 000 000 жана 555 000 000 доллары бар экени, бирок аларды кайтарып алуу ниетинен баш тартканы жазылган.
Каримова «Учурда ден соолугумга кабатырмын. Эки операция жасатуу керек. Ошондуктан президентке кайрылууга аргасызмын», – деген.
#Karimova #Uzbekistan Back from Zangiota. Client in bad shape. High blood pressure. Leg fully bandaged. No medical treatments. Fainted many times. Basic question to this government : Zangiota, why + until when? Stop this arbitrary detention.
— Grégoire Mangeat (@GregoireMangeat) June 17, 2019
Анын швейцариялык адвокаты Грегуар Манже Каримованын саламаттыгы начарлап кеткенин жана медициналык жардам көрсөтүлбөй жатканын маалымдаган.
46 жаштагы Гүлнара Каримова 2017-жылы Ташкент облустук сотунун өкүмү менен 10 жылга эркинен ажыратылган. Кийинчерек бул өкүм беш жылга кыскартылган. Ага «Алдамчылык», «Чет элдик валютаны жашыруу», «Бажы мыйзамдарын бузуу», «Кылмыштуу жол менен табылган кирешени мыйзамдаштыруу» сыяктуу беренелер менен айыптар коюлган.
Быйыл марттын башында Өзбекстандын Башкы прокуратурасы Гүлнара Каримова үй камагынан жалпы режимдеги түрмөгө которулганын билдирген.
