Эл аралык Human Rights Watch (HRW) укук коргоо уюму Кыргызстандын бийлиги «тыюу салынган материалдарды сактоо» иштери боюнча жүздөгөн айыпталуучуларга өкүм чыгарууда «экстремизмди» «ашыкча кеңири» түшүнүктө колдоно турганын билдирди.
Уюмдун бүгүн жарыяланган баяндамасында өлкөдө тыюу салынган материалдарды сактоого айыпталган жарандар аларды таркатпаса же аракеттеринде зомбулук чакырыктары болбосо дагы үч жылдан он жылга чейин эрктеринен ажыратыла турганы жазылган.
Мындан тышкары баяндамада адамдарга алар камалгандан кийин экстремисттик деп табылган материалдарды сактоо айыптары тагылган учурлар белгиленген. Уюмдун өкүлдөрү сүйлөшкөн бир нече шектүү укук коргоо органдарынын кызматкерлери тинтүү маалында аларга тигил же бул материалдарды ырыгытып коюшуп, кийин ал боюнча тергөөнү токтотуу үчүн акча талап кылышканын айтып беришкен.
«Ачык эмес критерийлер менен экстремисттик деп табылган материалдарды сактоо үчүн кылмыш жоопкерчилигине тартуу практикасы — саясий аттандаштарды, активисттерди, журналисттерди, адвокаттарды жана катардагы жарандарды негизсиз куугунтуктоого кеңири мүмкүндүктөрдү ачат», — деп билдирди баяндаманын автору Детта Тейлер.
