«Уран кендерин изилдөө жана иштетүүгө байланышкан геологиялык иштерге тыюу салуу тууралуу» мыйзам долбоору Жогорку Кеңештин кароосуна алынып чыкты.
Документтин демилгечилери депутаттар Алтынбек Сулайманов, Алмамбет Шыкмаматов, Канат Керезбеков, Мыктыбек Абдылдаев, Бактыбек Турусбеков, Дастан Бекешев жана Алтынбек Жунус уулу.
Мыйзам долбоору калктын саламаттыгын коргоо, радиациялык жана экологиялык коопсуздукту камсыз кылуу, жерди, суу объектилерин, өсүмдүк жана жаныбарлар дүйнөсүн коргоого багытталган.
Быйыл апрелде Ысык-Көл облусундагы Кызыл-Омпол уран кенин иштетүүгө байланыштуу чуу чыккан. Алгач бир катар жергиликтүү тургундар, жарандык активисттер кендин казылышына каршы нааразылык акцияларын өткөрүшкөн. Ушундан улам өкмөт кенди казганы жаткан «Кыргызстандагы ЮрАзия» компаниясынын лицензиясын токтоткон. Парламент «кен иштетилбесин» деген токтом кабыл алган. Президент Сооронбай Жээнбеков уран казылбай турганын айткан.
